Bachpan

Aao tumhe main le ke chalun, un bhooli bisri yaadon me
is bhag daud se door kahin, bachpan ki un baaton me

tension ka jahaan naam nahi, or maarna masti din bhar
mummy roj daatati fir bhi, pahunchana dress gandi karke ghar
kal pet dard, aaj kaan dard, ab kal toh hai mama ke jaana
home work poora kiya nahi, fir khojna roj naya bahaana
recess me khelne ke liye, periods me hi poora lunch kha jana
chhupam chhupai khelne ke waqt, baar-2 dame khud par hi aana
pachaas paise ki pocket money bhi, lagti thi jaise apaar
aajkal toh kam hai padte, chahe jeb me pachaas hajaar
Aao tumhe main le ke chalun, un bhooli bisri yaadon me
is bhag daud se door kahin, bachpan ki un baaton me

khareedate hain nayi dress aj hum, jab bhi ho jana bazaar
woh din or the jab hota tha, nayi dress ke liye diwali ka intzaar
brands ki is duniya me, kise chune, kon hai behtar
par sardi me sabse achha, woh mummy ke haath ka buna sweater
chaubees ghante nonstop music, sunkar ab hote hain bore,
adhe ghante ke chitrahaar ka, jab maja hi tha kuchh or
aaj poora cartoon network bhi, nahi man mera bahla sakta
woh sunday ka din or main, He-man or Mogli ki rah takta
cable ka jamaana nahi tha, hota tha mohalle me ek hi TV
invitation aata tha us ghar se, jab bhi VCR pe lagti movie
chacha chaudhary billu or pinky se, thi apni aisi dosti
ki chhuttiyan aatey hi unse milne ko, lag jati jaise daud si
Aao tumhe main le ke chalun, un bhooli bisri yaadon me
is bhag daud se door kahin, bachpan ki un baaton me

road par bajri ka dher, ab hamein jo gandagi hai lagta
banate the gharonde us mitti me, jab pados me koi makaan tha banta
baarish me bheegne ka maja, lete the doston ke saath
aaj bheegne ka darr itna ki, baarish me nikaalte ek hi haath
woh pehli cycle life ki, lagti thi humko kitni pyari
jo proud feel karte the uspe, aaj nahi woh hone par bhi gaadi
woh summer vacation me, jana mama ke ghar har saal
or July me school khulne par, hona fir se wahi bura haal
aj internet pe padte hain jokes, novels me milti kahaani
woh kahaani hain aaj bhi yaad, joh sunte the dadaji ki zubaani
maarte thahake the pahle jahaan, un chhoti-2 baaton pe
aaj taraste hain dekhne ko, chhoti si ek muskaan hothon pe
Aao tumhe main le ke chalun, un bhooli bisri yaadon me
is bhag daud se door kahin, bachpan ki un baaton me

Aaj sochta hun mai yahaan, ki laut ke aa jayen woh din
kyun bada hota hain insaan, kyun nahi rahta hamesha woh bachpan
na koi soch, na koi tension, naa hi jivan ki koi uljhan
simple plain ek life ho, umar chahe fir ho jaye pachpan
milega mauka woh din fir jeene ko, ab kahta hai yahi mera mann
suna hai maine ki budhape me, fir se laut aata hai bachpan

Tum

Subah ki pahli kiran dekhun toh, lagta hai ki tum ho
Sham ki thandi hawa ke jhonke me, lagta hai ki tum ho
Khushboo bikherti gulaab ki kaliyon me, lagta hai ki tum ho
Umang bikherti rangeen titliyon me, lagta hai ki tum ho

Garmi ke suraj ki chamak me, lagta hai ki tum ho
Baarish ki pahli boond ki khanak me, lagta hai ki tum ho
Saawan ke aane ki aahat me, lagta hai ki tum ho
Sardi ki dhoop se milti raahat me, lagta hai ki tum ho

Saagar ki tez lahron ke aane me, lagta hai ki tum ho
Jheel ke shaant thahre paani me, lagta hai ki tum ho
Mandir me pooja ke shabdon me, lagta hai ki tum ho
Khuda ki ibadat karte lafzon me, lagta hai ki tum ho

Har pal, har lamha mere mann me ab, lagta hai ki tum ho
Koi kami nahi jeevan me jab, lagta hai ki tum ho

Abhi toh Baaki hai - Hindi Poem

************** Abhi Toh Baki Hai *****************

Ek din subah dekh kamre ka nazaara, mera dil ghabraya
Padosi khade mere charo aur, aur khud ko bed pe mara paya
Bhainse pe sawaar Yamraaj ji, muskurate huye yeh bole
Chal beta kar liya poora tune, jitna bhi time tha yahaan likhaya

Main bola Maharaj, aapse shayad hui kuchh mistake hai
Mere toh itne kaam hai baaki, fir kaise yeh mera aakhri waqt aaya
Abhi toh baaki hai jeena mujhe, apne hisse ki zindagi
Jeena hai un sapno ko, nahi jo kisi ko bhi bata paya
Abhi toh baaki hai karne, apne poore shauk saare
Piano guitar or painting ko, sirf socha, par nahi haath ajmaya
Abhi toh baaki hai dekhna mujhe, duniya ke woh saat ajoobe
Cancel hua kisi kaaran se, jab bhi inhe dekhne ka plan banaya
Abhi toh baaki hai milna unse, jo the mere dost puraane
Kitno se toh baat hui, aur kitno ko toh phone bhi nahi milaya
Abhi toh baaki hai nibhane, bete ke woh farz adhoore
Paise toh bhijwaye unhe, par khud nahi milne jaa paya
Socha tha karunga saare kaam, jab khali samay milega mujhe
Har din naya ek kaam aaya, par khaali samay kabhi naa aaya

Sunke meri kahani, Yamraaj ji ne muaka paya aur mujhe pravachan sunaya
Tera nahi isme koi kasoor, aajkal sabhi ne apna yahi haal banaya
Saari umar bita di un kaamo me, jinse tumne sirf life chalaya
Par jo the Life Jeene ko jaroori, un kaaryon ko aagey se aagey tarkaya

Aa gayi thi mujhe baat samajh me, aur Yamraj ko shayad thoda taras aaya
Bole, Deta hun ek aur zindagi tujhe, agar tum naa karoge isse jaya
Tez roshni me woh gayab huye, aur jaate-jaate mere sar pe haath firaya
Woh subah kuchh alag hi thi, aur ek alag roshni ne mujhe neend se Jagaya

*******************************************************************

Comments & Suggestions are most Welcome!!

-- Kawal